食名遠播?

尋晚去咗一個長輩既壽宴,食飯既地方係一間連鎖既中式酒樓.因為長輩既囝囝係大廚

(唔係呢間酒樓),所以對食物要求好高!

於是每年壽宴既菜式都係一早預定,勁勁勁正! (兼勁貴,9個人食咗$6000

)! (但係我竟然唔記得帶相機影相?!)

呢圍壽宴其實係"自家飯",因為長輩只係同佢自己屋企人食,再請埋我同少爺,所以每年我地

都好"榮幸"咁出席,亦都好期待食乜正野?!

尋晚我正在食緊一隻有"五隻手指"咁粗既大蝦時(係少爺既手指呀!我既好幼架!)......

長輩(好認真): 小妹,您又話今晚黎唔到既?

小妹(個口仲含住蝦頭

): 係呀! 本來今晚要開工,不過搵學生同我調咗堂 (除非有緊要野,如果唔係平日我係唔會調堂既!)

長輩(陰陰咀笑): 硬係要黎!

您要食正野麻! (事緣有一年我大大聲話壽宴既餸咁正,唔黎食餐飽,真係"對唔住"自己呀!)

小妹:

親戚甲: 係呀! 呢餐真係好正!

小妹一定要黎喇! 您咁鍾意食,食多隻蝦喇!

親戚乙(叫侍應): 俾多隻蝦佢呀! 仲有,俾多碗"響螺燉湯"佢呀! 頭先佢飲到lam lam 脷呀!

小妹(大聲疾呼

): 我唔係因為為食先黎架! 我係因為長輩您生日,我先專登調堂黎架!

長輩: 我知我知! 同您講笑啫! 您食多d喇!

最後,我響大家"強迫"之下

,樣樣都食雙份兼打包一隻乳鴿,成碟福建炒飯加木瓜雪耳糖水返屋企................所以今晚又可以打斧頭唔煮飯喇!